Rusiye Maarif nazirligi başlanğıç mektep içün standartlar leyhasını deñiştirip, din derslerini qaytardı. Bu aqta RBK vesiqa kopiyasına esaslanıp bildire, dep haber ete Azatlıq Radiosı.
Evelki Tasil standartı leyhası «Din medeniyetleriniñ esasları – Rusiye halqlarınıñ din medeniyetlerininö esasları ve lâdiniy etika esasları» dersi çerçivesinde eki modulden ibaret edi. Yañı variantta altı modul bar: ortodokslıq, islâm, buddizm ya da yeudiy medeniyetiniñ esasları, Rusiye halqlarınıñ diniy medeniyet ya da lâdiniy etika esasları. Modulni talebeniñ ana-babası ya da olarnıñ vekili saylay. «Bar olğan variantlarda bir şey deñişmemege qarar aldıq – esas dinler boyunca dersler», – dep ayttı neşirge maarif naziriniñ birinci muavini Pavel Zenkoviç.
Al-azırda dördünci sınıfta mektep talebelerine «Diniy medeniyetler ve lâdiniy etika esasları» dersi berile. Ana-babalarnıñ saylav aqqı bar: balaları lâdiniy etika, dünya diniy medeniyetleriniñ esasları, ortodokslıq medeniyetiniñ esasları, islâm medeniyetiniñ esasları, buddizm medeniyetiniñ esasları ya da yeudiy medeniyetiniñ esasları.
Sentâbrniñ başında Maarif nazirligi başlanğıç tasil çerçivesinde bazı dinlerniñ ögrenüvi içün tasil standartınıñ leyhasını taqdim etti.
O vaqıt Moskva patriarhatı, din esaslarını ögrenüvde saylav imkânı semereligini isbatladı, bundan vazgeçüv ise «vatandaşlarğa, devletke, kilsege zarar ketirecek», dep bildirgen edi.
«Diniy medeniyetler ve lâdiniy etika esasları» dersi 2012 senesi sentâbrniñ 1-nden itibaren dördünci sınıf talebeleri içün mecburiy oldı. O vaqıt Tasil ve ilim nazirligi derc etken statistikası ana-babalarnıñ ekseriyeti balaları içün «Lâdiniy etika esasları» ve «Dünya diniy medeniyetler esasları» derslerini saylağanını kösterdi. Daa soñra Rus pravoslav kilsesi nazirlikten kurs derslerini kenişletmesini rica etken edi – dördünci sınıfta derslerniñ sayısını arttırıp ve ekinci sınıftan doquzıncı sınıfqa qadar ya da birinci sınıftan on birinci sınıfqa qadar.
Kilse vekilleri birinci sınıftan on birinci sınıfqa qadar derslerniñ kenişletilüvi artqan terror telükesinen bağlı, dep añlatqan edi.
