Ukrayına Telegram kanalları ve cenkke qoltutqan Rusiye blogerleri Ukrayına tarafından Kursk ve Belgorod vilâyetlerine kirilgenini bildire. İlk malümatqa köre, «Rusiye azatlığı» legionı, Rus göñülli korpusı ve Sibir batalyonı silâlı birleşmeleri sıñırdan beraber keçirgen operatsiyaları çerçivesinde keçti. Bu birleşmelerniñ erkânlarında esasen Ukrayına tarafında cenkleşken rusiyeliler bar.
Kursk vilâyetinde uruşlar Tetkino mesken yerinde oldı. Ağda peyda olğan videoda Ukrayına tankı Belgorodnıñ Gorkovskiy qasabasınıñ civarından kete, dep aytıla.
Kyivde yaşağan muhalifet siyasetçisi ve göñülli bölüklerinden biri ile alâqaları bar dep aytılğan İlya Ponomarevniñ aytqanına köre, Belgorod vilâyetindeki Lozovaya Rudka sıñır yeri «azat etici quvetlerniñ kontroli altında buluna».
«Rusiye azatlığı» Legionınıñ Telegram kanalında sıñırdan keçüv qayd etilgen video derc etildi, dep haber etile.
Berilgen malümatqa köre, Tetkinoda eki insan yaralandı. Baza Telegram kanalınıñ malümatına köre, yaralanğanlardan biri yerli sakin ola. Ekincisi aqqında bir malümat yoq. İlk malümatqa köre, al-azırda uruş devam ete. Toplar çalışa.
Moskva ve Kiyv eki Rusiye vilâyetindeki sıñırdan keçilgenini resmiy şekilde izaatlamadı.
Ukrayına Mudafaa nazirligi arbiy istihbarat vekili Andriy Yusov matbuatnen laf etip, Rusiyede «Rusiye azatlığı» Legionı, Rus göñülli korpusı ve Sibir batalyonı rusiyelilerden ibaret olıp, mustaqil bölükler olaraq areket ete. «Olar evlerindeler. Bu bölükler beraber areket etedir şimdi», – dep bildire Yusovnıñ aytqanlarını «24 Kanal».
Uruş areketleri şaraitlerinde taraflarnıñ malümatını teşkermek imkânsız.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
