Rusiye Avropada büyük cenkke azırlana, Ukraina birinci platsdarmı olacaq, dep ayttı Ukraina Milliy telükesizlik ve mudafaa şurasınıñ kâtibi Oleksandr Turçınov, dep bildire Azatlıq Radiosı.
«Rusiye arbiy infrastrukturasınıñ inkişafına tek milliardlarnen para sarf etmey. O, büyük cenk areketlerine, Avropada büyük qıta cenkine azırlana. Almağa tırışacaq birinci platsdarmı bizim memleketimiz olacaqtır», – dep ayttı MTMŞ kâtibi aprelniñ 11-nde Kyiv forumında.
Turçınovnıñ aytqanına köre, Rusiye ücüm ve ordu aviatsiyası qullana bilgen uçaq alanlarını ğayrıdan tiklep, arbiy bölüklerni Ukraina sıñırlarına yollamağa imkân bergen infrastruktura leyhalarını keçire.
O, Ukraina quvetleri Rusiye ordusına ğarpqa ilerilemesine yol bermez, dep eminliknen bildire.
Fevralniñ 26-nda Ukraina prezidenti Petro Poroşenko Rusiye tarafından büyük cenk telükesi «deklaratsiya degil de, kerçek ola», dep bildirdi.
Poroşenko BM Baş assambleyasınıñ toplaşuvında çıqışta bulunıp, Rusiye-Ukraina sıñırı boyunca Rusiye silâlı quvetleriniñ umumiy sayısı 87 biñ arbiyden ziyade ola, dedi.
Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete. BM malümatına köre, 2018 senesi dekabr ayına qadar zıddiyet vaqtında 13 biñ insan elâk oldı, tahminen 30 biñ yaralandı.
