Rusiye atiqiyatçıları Qırımda qanunsız qazuvlar vaqtında 80 biñge yaqın artefaktnı özüne ala bildi. Bunı "Apostrof" neşrine intervyü berir eken Ukrayina prezidentiniñ Qırım MC-deki daimiy temsilcisi Tamila Taşeva bildirdi.
"RF qanunsız atiqiyat qazmalarını kerçekleştire ve bizim artefaktlarımıznı özüne ala. Çeşit qıymetlendirmelerge köre, bu kibi qazmalar vaqtında Rusiye atiqiyatçıları Qırımda qanunsız qazuvlar vaqtında 80 biñge yaqın artefaktnı özüne ala bildi. Misal olaraq, Tavrida yolunıñ qanunsız quruluvı vaqtında. Bundan ğayrı 2018 senesi "Tavrida" yolunıñ quluruvı vaqtında Bağçasaray civarındaki Qırq Azizler qadimiy musulman mezarlığınıñ mezarları qazıldı. Qadimiy definlerniñ yerinde ağı tehnika işlegen edi", - dep haber etti Taşeva.
2021 senesi Qırım MC ve Aqyar şeeri Prokuraturası qanunsız atiqiyat qazmalar, Qırıda qıymetli medeniyet abidelerine ziyan ketirüv faktı ile bağlı cinayet davasını açqan edi.
Qırımnı işğal etken soñ Rusiye Qırım topraqlarındaki bütün medeniy ve tarihiy obyektlerni öz yurisdiktsiyasına aldı. Kıyiv Qırım topraqlarındaki diqqatqa lâyıq şey ve yerlerniñ ukrayin halqına ait olğanına israr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
