İşğal etilgen Qırımnıñ İçki qasabasına tahminen 600 Rusiye arbiyini yolladılar, lâkin boş bina olmağanı içün Rusiye kontrolindeki akimiyet yerli sakinlerden bu askerlerni öz evlerinde yerleştirmelerini rica ete. Bu aqta Qırımtatar Milliy Meclisiniñ reisi Refat Çubarov yerli sakinlerniñ malümatına esaslanıp bildire.
«Qasabada o qadar askerni yerleştirecek boş yer olmağanı içün Rusiye işğalci organları vatandaş ealisini Rusiye askerlerini öz evlerine almalarına çağıra», – dep yazdı Çubarov Telegram kanalında.
O, Rusiye arbiyleriniñ ekseriyeti Yakutiyada doğdı, dep qayd ete.
Qırımnıñ Rusiye akimiyeti vaziyetni daa izaatlamadı. Bu malümatnı mustaqil menbalarda tasdıqlamaq imkânsız ola.
Daa evel berilgen malümatqa köre, Rusiye ordusı Qırım yarımadasınıñ şimaliy qısmında okop qazıp başladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
