Rusiye arbiyleri yaqın 10-14 künü faal cenk areketlerini kerçekleştire bile, şimdi olar ücüm küçüni coya ve inertsiyağa köre areket ete. Bu aqta Azatlıq Radiosına Prezident ofisi yolbaşçısınıñ mesleatçısı Oleksiy Arestovıç tarif etti.
Onıñ aytqanına köre, Ukrainağa ücüm etken tahminen 200 biñ Rusiye arbiyinden 15 biñi öldürildi, daa 18-20 biñ ise cenkleşemeycek aldı.
«Qararnen 160 (biñ – muar.) şimdi areket ete, amma olar bütün Ukrainada uruşa, ve tahminen 10 (biñ – QA) yedekte qala. Böyle vaziyette ve cenkniñ şiddetinde bu acınıqlı bir küç. Mence, faal cenk areketleri içün daa 10, belki, 14 künü bar. Soñra mevzi cenk olacaq, olar mudafaağa keçe, meselâ, şimdi bizler Kyiv civarında kibi. Ve artıq operativ bir şey olmaycaq», – dep añlata Arestovıç.
Onıñ fikirince, bundan soñ kiçik köyler ve mevzilerni tegizlemek içün taktik uruşlar başlanacaq ve Rusiye arbiylerine bir yerden yardım kelmeycek.
«Şimdi yedeklerni tapıp olsalar bile, amma büyük problemleri bar, ne Rusiyede, ne Suriyede toplap olamadılar. Ve mında yollasalar bile, bu yedekler vaziyetni pek deñiştirip olamaz. Yani şimdi operativ bir çıqmaz ögünde turalar, soñra eki-üç afta içinde yutquzuv da kerçek ola bile», – dep tüşüne Prezident ofisi yolbaşçısınıñ mesleatçısı.
Onıñ aytqanına köre, Ukrainanıñ ücümlerge cevap bermek içün yeterli küçü bar. Faqat Rusiye kökten ücüm etmege devam etecek.
«Böyle şeyleri çoq, «İskander» çeşitli qanatlı raketalar ve olar darbe endirecek, belki, şimdiden daa çoq uracaqlar», – dep ayttı Arestovıç.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1lynpf6ndesae.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
