Link açıqlığı

Saatnıñ esas haberi

Rusiye arbiyleri Zaporijjâğa ücüm etti. Bir kişi elâk oldı, yaralanğanlar bar


Zaporijjâğa qarşı Rusiye darbesiniñ aqibetleri, 2025 senesi yanvarniñ 23-ü
Zaporijjâğa qarşı Rusiye darbesiniñ aqibetleri, 2025 senesi yanvarniñ 23-ü

Zaporijjâda cumaaqşamına keçer gecesi Rusiye raketa ücümleri neticesinde bir insan elâk oldı, 25 kişi yaralandı. Yaralanğanlar arasında eki aylıq bala da bar, onı hastahanege ketirdiler. Bu aqta vilâyetniñ arbiy memuriyet yolbaşçısı İvan Fedorov bildirdi.

Yaralanğanlar arasında Ukrayina fevqulâde vaziyetler devlet hızmetiniñ dört hadimi bar, dep qayd etti Fedorov. Soñra o, yaralanğanlardan beşiniñ alları ağır olğanını ayttı.

Onıñ aytqanına köre, şeerge yapılğan darbeler neticesinde mesken evler zarar kördi, patlav dalğası pencerelerni qırdı.

Vilâyetniñ arbiy memuriyet yolbaşçısı bildirgenine köre, Rusiye arbiyleri beş ücüm uçucısızınen Zaporijjâğa ücüm etti. Darbe neticelerini yoq etmek içün bütün tez yardım hızmetleri yollanıldı, dep yazdı Fedorov. Soñra o, büyük yanğınnıñ «qapatılğan» fotoresimini yerleştirdi.

Akimiyet angi obyektke ücüm etilgenini qayd etmedi. Rusiye arbiy blogerleri ücüm elektrik ast stantsiyasını nişanğa alğanını bildire. Bu malümatnı mustaqil menbalardan tasdıqlamaq imkân yoq.

Rusiyeniñ Mudafaa nazirligi Zaporijjâğa yapılğan ücümlerni izaatlamadı.

Cebeden bir qaç on kilometr uzaqlıqta yerleşken Zaporijjâ Rusiye ücümleriniñ nişanı ola, şu cümleden idare etilgen ava bombaları qullanıla. Darbeler neticesinde ölüm ve yaralanuvlar oldı, infrastruktura obyektleri yıqıla.

Tek yanvar ayında Rusiye arbiyleri Zaporijjâğa bir qaç kere ücüm etti. Yanvarniñ 9-na keçer gecesi Rusiye ücümi neticesinde 13 insan elâk oldı, 113 kişi yaralandı. Zaporijjâ vilâyetinde ölgenlerniñ hatırasına matem ilân etilgen edi. Yanvarniñ 18-nde Rusiye arbiyleri Zaporijjâğa raketalarnen ücüm etip, doquz insannı yaraladı.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG