Rusiye ordusı arman ayınıñ 29-na keçken gecesi Ukrayinağa 68 dronnen ücüm etti, dep bildirdi Ukrayina SQ Arbiy ava quvetleriniñ komandanlığı.
Ukrayina arbiyleriniñ malümatına köre, saat 08.00 ava mudafaası quvetleri memleketniñ şimalinde ve şarqında 46 dronnı urıp tüşürgen. Donetsk ve Dnipropetrovsk vilâyetleriniñ doquz yerinde 22 uçucısız uçaq urulğanı qayd etildi.
Dnipropetrovsk vilâyetiniñ arbiy memuriyetiniñ yolbaşçısı Sergey Lısak bildirdi ki, Dniproda infrastruktura obyekti ve yanğın bölügi zarar kördi, eki insan yaralandı, olardan biri ağır alda hastahanege ketirildi. Sinelnikovsk rayonında eki insan elâk oldı, daa bir insan yaralandı.
Zaporijjâ rayonında uçaqnıñ urması neticesinde qadın zarar kördi. Patlav dalğası ve viranelerden ev zararlandı, dep yazdı vilâyet memuriyetiniñ yolbaşçısı İvan Fedorov.
Rusiye arbiyleri Ukrayina regionlarına çeşit silâlarnen muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturasına ücüm etkenini, vatandaş ealisini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.