Ukrayina Silâlı Quvetleriniñ Ava quvetleri öz Telegram kanalında haber etti ki, Rusiye arbiyleri Ukrayinağa ücüm etmek içün qullanğan 216 BpLA-dan 192-si zararsızlaştırıldı.
Ukrayina arbiyleri 10 yerde 25 ücüm BpLA-nıñ urulmasını ve 5 yerde urulıp tüşürilgen BpLA parçalarınıñ tüşmesini qayd ettiler.
Ukrayina Ava quvetleriniñ malümatına köre, Quralaynıñ 12-sine keçer gecesi duşman Brânsk, Şatalovo, Kursk, Millerovo, Orel ve Primorsk-Ahtarsk yönelişlerinden, işğal etilgen Donetsk ve Qırımdaki Sarabuz qasabasından 216 "Şahed", "Gerbera" ve "Italmas" ücüm BPLA-ları ve "Parodiya" taqlitçi dronlar ile ücüm etti,
Bundan evel Kıyiv meri paytahtta dron parçaları tüşkeni aqqında haber etti. Yerli akimiyet de gece rusiye dronları Kıyiv vilâyetine ücüm etip, Fastiv rayonındaki bala bağçasına ve mesken binalarına zarar ketirgenini bildirdi.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.