Herson vilâyetiniñ Geniçesk rayonınıñ Sçatlivtsevo köyünde 22 kündir Rusiye arbiyleri tarafından qaçırılğan yerli sakinler ağa-qardaş Edem ve Refat Asanovlarnı qıdıralar. Bunıñ aqqında öz Facebook saifesinde Qırımtatar Milliy Meclis reisi Refat Çubarov yazdı.
"2022 senesi mayısnıñ 3-nde saat 12-lerde Sçastlivtsevo sakini Edem Asanovnıñ evine silâlı Rusiye arbiyleri basıp kirdi. İç bir şey añlatmadan ve vesiqalar köstermeden evini ve azbarını tintip çıqtılar, bir şey tutıp almadılar. Tintüv bitken soñ ev saibine olarnen ketmege emir ettiler. Aynı zamanda Edem Asanovnıñ tuvğanlarına onı bir künge sorğuğa alıp ketkenlerini ayttılar. Şu künü aynı şekilde öz evlerinden Refat Asanov daa 5(?) Sçastlivtsevo sakini mecburen alıp ketildi", - dep yazdı Çubarov.
Onıñ bildirgenine köre, mayısnıñ 3-nde qaçırılğan ağa-qardaş Asanovlardan ğayrı qalğan er kes azat etilgen.
"Edem ve Refat Asanovlarnı tuvğanları alâ daa qıdıralar, amma neticesiz. Aynı zamanda kimerde ağa-qardaş Asanovlar Yañı Kahovka ya da Melitopolge çıqırılğanları aqqında malümat peyda ola. Bu malümatnıñ kerçekligini teşkerip olamadıq", - dep qayd etti o.
Rusiyeniñ Ukrayinağa qarşı keniş mıqyaslı istilâsı başlanğandan berli aq qoruyıcılar ve mustaqil jurnalistler Herson vilâyetiniñ sakinleri kütleviy şekilde qaçırılğanını qayd eteler.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
