Yanvarniñ 8-nde gece ve saba Rusiye arbiyleri Ukrayina territoriyasına 51 çeşit raketa ve "Shahed-136/131" tipindeki sekiz ücüm dronnı qullanıp, kene de kütleviy bir raketa darbesini yaptılar, bunen beraber, altı "İskander-M" ballistik raketa işğal etilgen Qırımnıñ Canköy rayonından ve Çauda burnundan uçurıldı.
Bunı yanvarniñ 8-nde Ukrayina Ava quvetleriniñ matbuat hızmeti bildire.
''Kritik infraterkip obyektlerine, sanayı, grajdan ve arbiy obyektlerge ücüm etildi. Yerli arbiy memuriyetler zarar körgenler ve elâk olğanlar aqqında haber etecekler", - denile beyanatta.
Umumen 59 nişandan 18 Х-101/Х-555/Х-55 qanatlı raketa ve sekiz Shahed-136/131 tipindeki ücüm dron urıp tüşürildi. Bu malümatnı başqa menbalardan tasdıqlamaq şimdilik imkânsız.
Rusiye arbiyleri işğal altındaki Ukrayina topraqlarını, şu cümleden mülkiy obyektlerni muntazam sürette ateşke tuta. Delillerge baqmadan, Moskva bu darbelerniñ maqsadı Ukrayinanıñ arbiy infraterkibi olğanını iddia ete.
Rusiyeniñ Ukrayinağa istilâsı başlağanından berli Rusiye ordusı Qırımnı muntazam sürette ballistik raketalar ve ücüm uçaqlarını atmaq içün qullana.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
