Rusiyeniñ boru çekici ordusı, Büyük-Qarasu özeni yanında bulunğan yerinden ketti. Bu Tayğan suv anabarınıñ bentinden aşağı yerdir. Anda olar Aqmescit içün suv pompalay edi. Bu aqta Qırım. Aqiqatnıñ mühbiri haber etmekte.
Arbiyler meydannı temizlep kettлenler, amma suv yolu boruları anda qalğanlar ve er an qullanıla bile eken.
Tayğan ve Qarasuvbazar suv anbarlarından suv aqızmasını toqtattılar ve bir zamanları suvu bol olğan Büyük-Qarasu özeni ırmaqqa beñzep başladı.
Aynı zamanda, suv borularını qoumaq içün rus arbiyleriniñ balaban olmağan bölügi anda qalğan.
Qırımnıñ Rusiye yolbaşçısı Sergey Aksenovnıñ bildirgenine köre, dekabrniñ 15-nde bu eki suv anbarlarından suv alınuvı toqtatıla.
Aqmescitke suv bermek içün 50 kilometrlik suv borusı avgustnıñ 10-nda açılğan edi. Onı Mudafaa nazirligi qurdı.
Qırımlı iş adamı Oleg Zubkov yazda Taygan suv anbarında pek az suv qaldı, dep haber etken edi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
