Rusiye arbiyleri Odesadaki bazar territoriyasına raketalarnen urdı, dep bildirdi vilâyetniñ arbiy memuriyetiniñ yolbaşçısı Oleğ Kiper.
Onıñ aytqanına köre, grajdan infrastrukturağa zarar ketirildi. Zarar körgenler ve ücümniñ aqibetleri aqqında malümat daa yoq.
"Duşman Odesa civarında, bazar yanındaki çoq adamlı yerge sinik bir şekilde raketalarnen darbe endirdi", — dep yazdı o telegramda.
Saba yerli akimiyet Odesanıñ cenübinde sivil infrastrukturağa daa bir Rusiye ücüminiñ yapılğanı ve eki adamnıñ yaralanğanı aqqında haber etti.
Fevqulâde vaziyetler devlet hızmetinde, Rusiyeniñ dron ücümine Belgorod-Dnistrovskıy şeeriniñ oğrağanını qayd ettiler.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.