Oktâbrniñ 15-ne keçer gecesi Rusiye ordusı Mıkolayıv ve vilâyetine işğal etilgen Qırımdan C-300-400 idare etilgen zenit raketalarınen ücüm etti, dep haber ete Ukrayina Ava quvetleri.
Mıkolayıv vilâyeti arbiy memuriyetiniñ yolbaşçısı Vitaliy Kim bildirgenine köre, ücüm infrastruktura obyekti, restoran kompleksi, ticaret noqtaları, mesken evler ve maşinalarğa zarar ketirdi.
«Yanğın çıqtı, söndürmege devam eteler. Darbe neticesinde bir qadın elâk oldı, 16 kişi yaralandı, üçüne yardım kösterildi», – dep bildirdi vilâyetniñ yolbaşçısı.
Devlet fevqulâde vaziyetler hızmetiniñ malümatına köre, ücüm neticesinde 30 ve 400 metr kârede yanğınlar oldı, episi söndürildi. Diger rayonda 1400 metr kârelik alanda yanğın oldı, söndürmege devam eteler.
Rusiye küçleri daima çeşit türlü silâ qullana – ücüm uçucısız, raketa, tüzetilgen ava bombaları, toplu ateş reaktiv sisteması – Ukrayina regionlarına ücüm eteler.
Rusiye reberligi Rusiye ordusı Ukrayina şeer ve köyleriniñ vatandaş infrastrukturasına maqsatlı ücümler yapqanını, sakinlerni öldürgenini ve hastahane, mektep, bala bağçaları, energetika ve suv teminatı obyektlerini yıqqanını inkâr ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayeti olaraq tasnif etip, belli maqsadları bar, dep qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
