Mariupolde Rusiye işğalcileri yüzlernen silâsız adam ateşten saqlanğan Dramatik teatriniñ binasına avadan bomba taşladılar. Bunı Mariupol şeer şurasınıñ matbuat hızmeti haber etti.
"Bu deşetli ve insaniyetsiz areketniñ büyükligini qıymetlendirmek şimdilik imkânsız, çünki şeerde meskün maallelerniñ ateşke tutulması devam ete. Malüm olğanı kibi, bombalavdan soñ Dramatik teatriniñ merkeziy qısmı yıqılğan, sınıq parçaları ise binadaki bomba sığınağına kiriş dağınıqlar altında qaldı. Zarar körgenlerniñ sayısı daa belli degil", - dep haber ettiler yerli başlıqlar.
Evel Rusiye arbiyleri Mariupoldeki vilâyet hastahanesiniñ ekimlerini ve hastalarını esirlikke alğan edi.
Yerli başlıqlarnıñ malümatına köre, şeer er kün toplardan, "Grad"lardan ve mina topularından atekşe tutula. Şeerde yıqılmağan evler aman-aman qalmağan.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
