Rusiye Mariupolden gumanitar koridor yönelişinde arbiy areketlerge başladı, dep haber ettiler Birleşken Quvetler Ameliyatınıñ ştabında.
"Mariupolniñ ealisini bir yol boyunca tahliye etmek içün şeerniñ imayecileri bir sıra tedbirler kördiler: yollar mayınlardan temizlendi, müendislik çitler alındı. Amma buña baqmadan işğalciler balalarnı, qadınlarnı ve qart adamlarnı şeerden yibermediler. Duşman gumanitar koridor yönelişinde ücüm etti", - dep yazıla bildirmede.
Evel Zaporijjâ VAM, Zaporijjâdan Mariupolge tahliye içün avtobuslar çıqqanını ve gumanitar yük yollanğanı aqqında haber etken ediler.
Keçenlerde Human Rights Watch halqara aq qoruyıcı teşkilâtı Rusiyeniñ ücüminden tuzaqqa tüşken silâsız ealiniñ Mariupolden tahliyesiniñ temin etilmesiniñ kerekligini ilân etti.
Martnıñ 3-nden Mariupolde elektrik energiyası, suv ve qızdıruv yoq, şeerde mobil bağa da aman-aman yoq.
Rusiye ateşke tutmalarnı devam etkeni içün martnıñ 5 ve 6-nda Mariupolden adamlarnıñ tahliyesi olmadı.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete. Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
