Kyivniñ Svâtoşın ve Şevçenko rayonlarında Rusiye arbiyleri martnıñ 23-nde açqan ateş neticesinde şahsiy evler, bir çoq qatlı ev ve alış-veriş merkezi zarar kördi, dört insan yaralandı. Bu aqta Kyiv şeer devlet memuriyeti haber ete.
«Gece Svâtoşın rayonında alış-veriş merkezine ve şahsiy sektorğa ateş açıldı. Yanğın söndürildi, yaralanğanlar yoq. Alış-veriş mmerkezi ve eki şahsiy ev zarar kördi», – dep aytıla haberde.
Saba şeerniñ Şevçenko rayonı da ateşke oğradı.
«Adise yerinde qurtarıcılar ve ekimler çalışa. Al-azırda bir qaç şahsiy ev ve çoq qatlı evde yanğın bar. Dört kişi yaralandı. Zarar körgenler ve viraneler aqqında malümat teşkerile», – dep qayd etti Kyiv şeeriniñ devlet memuriyeti.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: d3hzcgsd893cx5.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
