30-dan çoq insan elâk oldı, 100-den çoq – Rusiye ordusınıñ Donetsk vilâyetindeki Kramatorsk vokzalına açqan ateşi neticesinde yaralandı. Bu aqta aprelniñ 8-nde «Ukrzaliznıtsâ» bildirdi.
Qayd etilgenine köre, vokzalğa eki raketa tüşti.
«Kramatorsk şeerindeki demir yolunıñ yolcu infrastrukturasına ve sakinlerine doğru bir darbe», – dep bildirdi «Ukrzaliznıtsâ».
Donetsk vilâyeti arbiy memuriyetiniñ yolbaşçısı Pavel Kirilenko başta darbe «İskandernen» kerçekleştirildi, vokzalda ise biñlernen insan bar edi, dep bildirdi. Soñra ise darbe, alınğan malümatqa köre, «Toçka-U» raketasınen endirildi, «amma manası deñişmey», dep qayd etti.
«Adise yerinde çalışqan polis ve qurtarıcılar onlarnen ölgen ve yaralanğan insan aqqında bildire. Raketa darbesi vaqtında vokzalda biñlernen insan bar edi, çünki mında Donbas sakinleri Ukrainanıñ daa telükesiz vilâyetlerine tahliye etile. Raşistler nişanını ve istegenini yahşı bile edi: olar Ukrainanen bağlı er şeyni yoq etmek içün mümkün olğanı qadar çoq esir almağa istey», – dep yazdı o, Telegramda.
Akimiyet Donetsk ve Lugansk vilâyetleriniñ sakinlerini regiondaki vaziyet kerginleşkeni içün tez tahliye olmağa çağırdı.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
