Rusiye kontrolindeki Kezlev memuriyetiniñ yolbaşçısı Yelena Demidova Rusiye arbiyleri talimler keçirecek dep, şeerde ateş ve patlav sesleri olacağını ilân etti.
«Ürmetli kezlevliler! Poligonımızda talimler başlandı. Ateş ve patlav sesleri eşitilse, raat oluñız», – dep bildirdi Demidova Telegram kanalında.
Soñki vaqıtları Rusiye arbiyleri Kezlevde talimlerni sıq-sıq keçirip başladı. Rusiye arbiyleri mayısnıñ 23-nde, bundan evel ise mayısnıñ 16-sı ve 6-nda şeerde talimler keçirgen edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayına uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
