Britaniya istihbaratınıñ qayd etkenine köre, Keriç köprüniñ cenübiy tarafında sekiz barja tapıldı. Montaj mayısnıñ 10-nda başlandı ve mayısnıñ 22-nde yekünlendi.
"Bu barjalar Rusiye ordusı tarafından köprü ve gemi kanalını qorçalamaq içün qoyuldı, ukrayin pilotsız suv üstü apparatları içün kiriş noqtalarını qısqarttılar", — deyler istihbaratçılar.
Qayd etilgenine köre, "evel qurulğan konstruksiyalar furtunalar neticesinde zarar kördi, bu ise olarnıñ semereliligini eksiltti".
Bundan evel Bild alman neşiri ekspert ve talilcilerniñ malümatına esaslanıp, ukrayin ordusı Keriç köprüne yañı bir darbe endirmek içün azırlana, dep bildirdi. Bunı, hususan, Rusiye "Avangard" ve "Konro Trader" paromlarına yapılğan ücüm köstere.
2022 senesi oktâbr ayında Keriç köpründe patlav yüz berdi. 2023 senesi iyülniñ 17-nde Keriç köpründe daa bir patlav oldı. Rusiye akimiyeti patlavlarda Ukrayina ordusını ve ukrain mahsus hızmetlerini qabaatlay. Kıyiv tek bir qaç ücümde qabaatını tasdıqlay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
