Cuma künü, dekabrniñ 22-nde, saba Rusiye arbiyleri Herson vilâyetinde Novooleksandrivka topraq cemiyetiniñ Mıhaylivka köyüne toplarnen ücüm etti, dep bildirdi Berıslav rayon arbiy memuriyetiniñ yolbaşçısı Volodımır Lıtvınov.
Qayd etilgenine köre, ateş neticesinde mesken ev ve hocalıq inşaatları zarar kördi, qurbanları yoq.
Dekabrniñ 22-nde saba Rusiye arbiyleri Hersonğa darbe endirdi, 85 yaşında qadın yaralandı.
Herson vilâyetiniñ arbiy memuriyeti bildirgenine köre, keçken künü Rusiye ordusı regionğa 117 kere ateş açtı, bir kişi elâk oldı ve eki insan yaralandı.
Rusiye arbiyleri, top, toplu ateş raket sistemaları, dron ve raketalarnı qullanıp, Ukrayina şeerlerine muntazam sürette ateş aça. Delil ve şaatlıqlarğa baqmadan, Moskva Ukrayinada vatandaşlarğa qarşı ücüm yapqanını inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
