Rusiye arbiyleri Harkivge nevbetteki darbe endirdi, dep tarif etti vilâyet arbiy memuriyetiniñ yolbaşçısı Oleğ Sineğubov.
"Al-azırda 25 zarar körgen adam bar, olardan üçü bala", — dep bildirdi Sineğubov.
Onıñ aytqanına köre, Rusiye ücüminiñ neticesinde çoq qatlı mesken binada yanğın çıqtı.
Soñra Sineğubov, qurtaruv-qıdıruv ameliyatı devam ete, dep añlattı.
"Binanıñ bir kirişi bozulğan. Ateş 9-ıncı qatta. Eñ azından 1500 penceresi bozulğan. Bir çoq araba zarar kördi. Üç adam ağır alda buluna. Umumen 30 yaralanğan", — dep qayd etti o.
Bundan da ğayrı, Harkiv SİZ yolbaşçısınıñ aytqanına köre, viraneler altında insanlar buluna bile.
"Eki adamnı tahliye eteler. Mında mütehassıs, gumanitar ve halqara ve ukrayin teşkilâtları çalışalar", — dep yekünledi Sineğubov.
RF quvetleri çeşit silâ çeşitleri ile muntazam sürette ukrayin regionlarına ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
