Rusiye arbiyleri Harkivdeki işhanege ücüm etti, 16 insan yaralandı, dep bildirdi şeer başı İğor Terehov.
Onıñ aytqanına köre, ücümden soñ büyük yanğın çıqtı. Dağıntılar altında eki adam ola bile, olarnı qıdırmağa devam eteler
Zarar körgenlerniñ arasında 16 yaşında bala bar. Yaralanğan üç kişiniñ alı ağır, dep yazdı Harkiv vilâyeti arbiy memuriyetiniñ yolbaşçısı Oleğ Sıneğubov.
Rusiye arbiyleri Harkiv vilâyetini muntazam sürette ateşke tutalar. Sentâbrniñ 24-nde Harkivde bir mesken evine Rusiye ava ücümi neticesinde beş insan elâk oldı, 30-dan ziyade kişi yaralandı. Terehovnıñ yazğanına köre, evniñ altı qatı yıqıldı. Onıñ aytqanına köre, bu çoq qatlı evni cenkniñ başında Rusiye arbiyleri ateşke tuttı, amma ev tamir etildi ve qızdıruv mevsimine azırlandı. Onda 82 adam yaşay edi.
RF reberligi, Rusiye ordusınıñ büyük cenk vaqtında Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.