Rusiye ordusı dekabrniñ 16-na keçer gecesi Ukrayınağa üç yönelişten – Krasnodar ülkesi, Brânsk ve Kursk vilâyetlerinden 31 Shahed uçucısızınen ücüm etti, dep aytıla Ukrayına Silâlı quvetleriniñ haberinde.
Ukrayına arbiyleri bildirgenine köre, 30 dron Dnipropetrovsk, Kyiv, Vinnıtsâ, Çerniğiv, Sumı, Poltava, Çerkası, Herson, Zaporijjâ, Mıkolayıv ve Hmelnıtskıy vilâyetinde tüşürildi.
Kyiv şeer arbiy memuriyetiniñ yolbaşçısı Serğiy Popko yazğanına köre, ava mudafaasınıñ işi ve parça tüşmesi neticesinde yaralanğanlar yoq.
Onıñ qayd etkenine köre, Rusiye arbiyleri Kyivge qarşı ücümlerde «2023 senesiniñ mayıs» taktikasına qayttı, o vaqıt ava ücüminiñ çeşitleri birleştirilgen ve deñiştirilgen edi.
«Kyivliler bunı dekabrniñ birinci yarısında is ettik. Uçucısızlar, strategik bombardımannen qanatlı raketalar, «İskanderler», «Kinjallar» Kyivge sıra-sıra kele», – dep aytıla haberde.
Aynı vaqıtta, Rusiye Mudafaa nazirligi cuma künü, dekabrniñ 15-nde, Kursk vilâyetinde ve işğal etilgen Qırımda 32 uçucısız urıp tüşürildi, dep esabat berdi.
Kursk vilâyetinde Rusiye ava mudafaası altı dronnı tüşürdi, dep aytıla.
Moskva saatınen 20:30-tan 22:30-qa qadar işğal etilgen Qırım yarımadasında Rusiye arbiyleri 26 dronnı yoq etti.
Dekabrniñ 16-nda saba Kursk vilâyetiniñ valisi Roman Starovoyt Dmitriyevskiy rayonınıñ Krupets köyünde üç «ücüm» aqqında bildirdi. Onıñ aytqanına köre, neticede sekiz evniñ qoraları, pencere, damları zarar kördi. Bundan ğayrı, kompressor stantsiyası zarar kördi. Jeleznoğorskıy rayonında uçucısızlar elektrik hatına zarar ketirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
