İrpin ve Ğostomel şeerlerine açılğan ateş vaqtında martnıñ 22-nde aqşam Rusiye arbiyleri fosfor bombalarını qullandı. Bu aqta martnıñ 23-nde İrpin şeer yolbaşçısı Oleksandr Markuşın bildirdi.
«Martnıñ 22-nde aqşam keç olğanda Rusiye işğalcileri Kyivniñ şimaliy-ğarbiy çetinde yasaqlanğan fosfor bombalarını qullandı. Tahminiy zarar körgen yer – Ğostomel-İrpin», – dep bildirdi Markuşın Telegramda ve fotoresim qoydı.
Onıñ hatırlatqanına köre, barışıq ealige qarşı böyle silânıñ qullanıluvı insaniyetlilikke qarşı cinayet ve 1949 senesi Jeneva şartnamesiniñ bozuluvı ola.
Ukraina akimiyeti bildirgenine köre, Rusiye arbiyleri Ukrainağa qarşı cenkte yasaqlanğan fosfor bombalarını qullana. Böyle adiseler Kramatorskta, Popasna rayonında oldı.
Rusiyeniñ Ukrainağa qarşı silâlı istilâsı fevralniñ 24-nden sabadan berli devam ete. Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Kreml, «operatsiya» dep adlandırılğan ücüm vaqtında Ukrainada vatandaşlarnı tiymeycek, dep bildirgen edi, amma mesken evler, hastahane, bala bağçaları, mektep ve diger vatandaş infrastrukturasını bombalay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: d3hzcgsd893cx5.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
