Rusiye Federatsiyasınıñ Ukrainağa ücüm etkeninden berli Rusiye arbiyleri 135 hastahanege ateş açtı, doquzı bütünley yoq etildi. Bu aqta Ukraina sağlıq naziri Viktor Lâşko bildirdi.
«135 hastahanege ateş açıldı, 9 hastahane temeline qadar yoq etildi ve olarnı ğayrıdan tiklemek artıq imkânsızdır. Olarnıñ yerinde yañı hastahaneler qurulmalı. 43 acele yardım maşinasına ateş açıldı, altı tibbiy hadim öldürildi, 16 tibbiy hadim ağır yaralandı», – dep bildirdi nazir.
Onıñ hatırlatqanına köre, martnıñ 20-nde gumanitar kolonnanen ketken acele tibbiy yardım taqımı Rusiye ordusı tarafından esir alındı.
«Böyle bir şey dünyanıñ iç bir yerinde olmağandır. Bunı tek Rusiye terroristleri memleketimizde yapa. Hadimler sağ ve olarnı bugün qaytarğanlar, çoq şükür», – dep ayttı Lâşko.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://ddqp4xjpo7z2y.cloudfront.net/ . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
