Rusiye arbiy yüklerni qapalı arabalarnen Keriç köpründen taşıy, dep bildirdi Qırımtatar resurs merkeziniñ yolbaşçısı Eskender Bariyev FREEDOM telekanalınıñ yayınında.
«Elimizdeki malümatqat köre, qapalı arabalar Qırımğa silâ taşıdı ve, ebet, başqa çareleri yoq, çünki arbiy tehnikanı taşığan paromlarğa da darbe endirildi. Demek ki, olar Ukrayınağa qarşı cenkni devam ettirmek içün köpürni logistik maqsadlarda qullanacaq», – dep qayd etti o.
Bariyevniñ aytqanına köre, Rusiye arbiy komandanlığı yarımadada ve zapt etilgen diger Ukrayına topraqlarında ordunı teminleycek alternativ yollarnı qıdıra.
«Olar Şimaliy Priazovyede qara koridorını qullanmağa tırışalar; yarımadanı temin etmek içün maşina yolunı qullanalar. Bundan ğayrı, demiryolnı faal bir sürette quralar… Mence, maqsatlardan biri – demiryol Canköyge qadar yapılğanına qadar onı bütünley alqağa almaq», – dedi Qırımtatar resurs merkeziniñ yolbaşçısı.
Aprelniñ 29-nda Ukrayına Cenübiniñ mudafaa quvetleri Birleşken koordinatsion matbuat merkeziniñ yolbaşçısı Dmıtro Pletençuk bildirgenine köre, Rusiye akimiyeti 2024 senesi mart ayından berli Ukrayına darbesiniñ telükesi sebebinden Keriç boğazından yaqarlıq taşımay.
Cenkni tedqiq etüv institutınıñ malümatına köre, iyünniñ 8-nde yapılğan levhalar Rusiyeniñ Keriç boğazından yaqarlıq taşığanını köstere.
Keriç köprü işğal etilgen Qırımnı Rusiyenen bağlay. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde Keriç köpründe oldı. Rusiye akimiyeti patlavlarda Ukrayına ordusını qabaatlay ve olarnı talimler dep adlandıra. Kyiv tek bir qaç ücümge alâqası bar olğanını resmiy şekilde tasdıqlay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
