Qırımtatar Milliy Meclisiniñ reisi Refat Çubarov Qırım sakinlerini yarımadada Rusiye arbiy obyektlerine Ukrayina silâlı quvetleriniñ ücümleri şiddetli olmağa başlağanı sebebinden öz havfsızlığını qayğırmağa çağırdı ve şu yerlerden köçmekni tevsiye etti.
"Qırım sakinleriniñ diqqatına: soñki vaqıtları Ukrayina Silâlı quvetleri tarafından Qırımda Rusiye arbiy obyektlerine sıq-sıq yapılğan darbeler, daa ciddiy areketlerniñ başlanuvı ola bile. Buña köre, eger de siz Rusiye arbiy obyektleriniñ yanında yaşasañız, şe yetlerden köçmege ya da başqa bir şekilde özüñizniñ ve tuvğanlarıñıznıñ telükesizligini temin etmege çare tapıñız", — dep yazdı Çubarov içtimaiy ağlarda.
Quralaynıñ 3-nde haber etilgenine köre, Qırımğa ekinci gece ardı-sıra uçucısız uçaqlar ücüm etken, eki gece devamında bir sıra meskün yerlerde patlav sesleri ve RF Ava mudafaasınıñ işi eşitilgen.
"Krımskiy veter" Telegram kanalı abunecileriniñ malümatına atıf etip, Kefe, Aqmescit, Sarabuz, Canköy, Saq ve Saq rayonı, Novofedorovka, Ermeni Bazar, Tarhan Qut ve Ulu Qol (Lukull) burunları, Acı Bolat (Uglovoye) ve Çalğarı (Krasnoye) köylerinde patlavlar aqqında bildirdi. Kaça, Belbek, Novofedorovka ve Sarabuz yaqınlarında Rusiye arbiy uçaq alanlarına qarşı ücüm aqqında haber etildi. Darbe neticeleri şimdilik belli degil.
2022 senesinden başlap yarımada aman-aman er kün uçucısız ve raketalarnıñ ücümine oğray, çoqusı alda Rusiye Federatsiyasınıñ Mudafaa nazirligi ya da Rusiye akimiyeti, bu malümat olsa da, arbiy obyektlerge darbe endirilgenini tasdıqlamay.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
