Kyivniñ Peçersk rayon mahkemesi, Qırım sakinleriniñ Rusiye ordusına askerlikke celp etilmesi faktı ile Aqmescit rayonı ve Aluşta şeeriniñ rus arbiy komissarına qarşı mahkemeden evel tahqiqat keçirmege izin berdi.
Bunı Qırım MC ve Aqyar şeeriniñ Prokuraturasınıñ matbuat hızmeti haber ete.
«Kyivniñ Peçersk rayon mahkemesi Muhtariyet prokuraturasınıñ muracaatını qanaatlendirdi ve cenk qanunlarınıñ ve adetleriniñ bozulmasınen (Ukraina CQ 438-nci maddesi 1-nci qısmı) şübeli sayılğan «Qırım Cumhuriyetiniñ Aqmescit rayonı ve Aluşta şeeriniñ rus arbiy komissarına» qarşı mahsus mahkemeden evel tahqiqat keçirmege izin berdi», – dep yazıla bildirmede.
Evel, aynı şübe Rusiyeniñ nezaretinde olğan Aqmescit rayonı ve Aluşta şeeriniñ, Aqyarnıñ, Krasnoperekopsk ve Krasnoperekopsk rayonınıñ arbiy komissarlarına ilân etilgen edi.
Qırım uquq qoruyıcı gruppasınıñ malümatına köre, Qırımda Rusiye Silâlı quvetlerinde arbiy hızmetten qaçınuv içün mahkeme Qırım sakinlerine 6 üküm çıqardı.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
