Beyazrusiye Mudafaa nazirligi Rusiye ile beraber keçirgen «uçuş-taktik talimlerini» ilân etti, olarnıñ vaqtında «bütün uçaq alanları, arbiy ava quvetleri ve ava mudafaa orusınıñ bütün poligonları qullanılacaq».
Planlarğa köre, talimler yanvarniñ 16-nda başlanacaq ve aynıñ soñuna qadar keçirilecek. Berilgen malümatqa köre, talimlerde iştirak etmek içün Rusiye Ava-kosmik quvetleriniñ aviatsiyası Beyazrusiyege keldi.
Beyazrusiyege tahminen on biñ Rusiye arbiyi keldi. Eki memleketniñ akimiyetleri başta talimler aqqında ayttı, soñra «ğarbiy sıñırlarındaki vaziyet kerginleşken» «ittifaq devletiniñ silâlı qoruvına» başlağan ordu gruppirovkasınıñ quruluvı aqqında ilân etti.
Ukrayına arbiy komandanlığı Rusiye ordusı Beyazrusiyeden yañı bir istilâ kerçekleştire bile, dep bildirgen edi. Muvafaqiyetsiz yekünlengen ilk ıntıluvı büyük cenkniñ başında da oldı.
Bazı ğarp ve Ukrayına arbiyleriniñ malümatına köre, Ukrayınağa qarşı yañı ücümde Beyazrusiye arbiyleriniñ iştiraki inkâr etilmey.
Beyazrusiye muhalifetiniñ liderlerinden biri Pavel Latuşko Beyazrusiye akimiyeti eñ yaqın vaqıtta Ukrayınağa qarşı cenkte Rusiyege arbiy yardım köstermek içün seferberlik başlata bile, dep bildirdi. Onıñ aytqanına köre, seferberlik içün er şey azır.
Lukaşenko yolbaşçılığında Beyazrusiye reberli Rusiyeniñ esas ittifaqdaşlarından biri ola, onıñ ordusı bıltır fevral ayında Ukrayınağa ücüm etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
