Advokat Edem Semedlâyev aprelniñ 17-nde Rostov №5 SİZOsında qırımlılar – Qurmandaki «Hizb ut-Tahrir davasınıñ» mabüsleri Arsen Abhairov ve Eskender Abdulagiyevni – ziyaret etken soñ müvekkilleriniñ sağlıq vaziyeti fenalaştı, dep qayd ete. Onıñ aytqanına köre, yaramay aş sebebinden hususan tişler zarar köre.
Bu aqta o, «Qırım birdemligi» birleşmesine bildirdi.
«Elbette, SİZOda insanlar içün şarait olmağan soñ sağlıqları zarar kördi. İlk evelâ, tişler zarar köre. Arsenniñ 3 tişi tüşti, qalğanları parçalanıp başlay, yahşı aşamağanları içün diger problemler de bar, amma buña baqmadan, balalar dayana», – dep tarif etti Semedlâyev.
Onıñ qayd etkenine köre, artıq SİZOğa kirmek daa qıyın oldı.
«Bunıñ sebebi, birinciden, yañı koronavirus yuqunçınıñ tarqaluvı ola, qoşma teşkerüvler keçirile ve tedbirler alına. Ekinciden – yaqında SİZO №5-ten qaçqanlar oldı», – dep tarif etti advokat.
Onıñ aytqanına köre, şimdi advokat tahqiqat izolâtorına kirgende daa evel olmağan tedbirler ola.
«Farqlı şekilde foto yapıla, köz çilter zarı baqıla ve bulunuv telükesizligi içün daa bir sıra tedbir. SİZO yanında saba saat 7-de olsam da, tek üylege yaqın kirip oldım», – dep añlattı Semedlâyev.
Rostov-na-Donu Cenübiy okrugınıñ arbiy mahkemesi (Rusiye) yanvarniñ 29-nda Qurmandaki «Hizb ut-Tahrir davasınıñ» mabüsleri Rustem Emirüseinov, Arsen Abhairov ve Eskender Abdulganiyevniñ davası temelden baqılıp başlandı.
2019 senesi dekabr ayında Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davası» mabüslerini 2020 senesi iyünniñ 13-ne qadar apiste qaldırdı.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinovalındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
