Lipetsk vilâyetiniñ Yelts şeerindeki şahsiy klinika ekimleri qırımlı faal Vladlen Abdulkadırovnıñ arqa qısmında şişik ve yırtıqlar tapqanlarını bildirdi, dep haber ete onıñ ömür arqadaşı Gülzar.
"Qırım birdemligi" qayd etkenine köre, Abdulkadırovnıñ teşkerüv neticelerine köre, fizikiy ağırlıqlar, yelli ve uzun müddet bir yerde turmaq yasaq.
''Vladlen teşkerüvden evel bile arqa ağrısından şikâyet ete edi. Apishaneniñ hadimleri oña işke kelmege talap ettiler, amma o, pek yaralandı ve MRT bekley, dep ayttı. Vladlenniñ aytqanına köre, eger ekimler onıñ ağır yükni taşıy bilecegine inansa, o, işke çıqacaq. Apishaneniñ memuriyeti bunı işten vazgeçüv olaraq tanıdı ve qırımtatarnı 1 biñ ruble para cezasına mahküm etti'' – dep haber ete ''Qırım birdemligi''.
Vladlenniñ özü aytqanı kibi, o çoq vaqıt bir yerde turıp olamay, onıñ sağ ayağı areketsiz edi.
2022 senesi mayısnıñ 12-nde Rostov-na-Donudaki Cenübiy okrugınıñ arbiy mahkemesi qırımtatarlarnı «Hizb ut-Tahrir» teşkilâtına alâqası bar olğanında qabaatladı. Bilâl Adilov, Tofik Abdulgaziyev, Vladlen Abdulkadırov, İzzet Abdullayev ve Mecit Abdurahmanov umumen 62 yılğa azatlıqtan marum etildiler.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
