Rusiyeniñ Ulyanovsk vilâyetiniñ Dimitrovgradındaki apishane hadimleri mabüslerni zorlap tıraş eteler, diniy ve etnik sebeplerden aqaretleyler, kötekley ve musulmanlarğa ibadet etmege bermeyler. Bu aqta «Vatandaş imdatı» beş mabüsniñ malümatına esaslanıp haber ete.
Üç subetdeş Rusiye aq qorçalayıcılarına iyülniñ başında olarnı zorlap tıraş etkenler ve zorbalıq qullanılacaq dep tıraş olmağa mecbur etken ediler. Bundan evel olar mahsus cihazlarnen saqal ve saç tıraş etken ediler, lâkin hadimler olarnı sındırğanlar.
«Olar saç ve saqallarımıznı almamıznı talap etkenler. Men razı olmadım, çünki aqlarım bozula. Apishane hadimi «mındaki qanun o», dep cevap berdi», – dep ayttı mabüslerden biri.
Eki mabüsniñ aytqanına köre, diger musulmanlarnı zorlap tıraş eteler, baş saçı ve saqal «çizgi-çizgi» qala. «Bir qarar körünmek içün» bazı mabüsler özleri tıraş ola.
Rusiyeniñ Cezalarnı yerine ketirüv federal hızmetiniñ vekilleri musulmanlarğa ibadet etmege keder ete: sesli muzıka ya da radio aça, namazlıq ve diniy edebiyatnı alalar, namaz vaqtında tintüv keçireler. Bazı apishane hadimleri musulmanlarnıñ aşına domuz etini qoşalar, böylece mabüsler aşamay.
«KrımSOS» teşkilâtınıñ malümatına köre, 2023 senesiniñ başından rusiyeliler eñ az 14 qırımlı siyasiy mabüsni Rusiye apishanelerine avuştırdı.
Dimitrovgrad apishanesinde qırımlılar Raim Ayvazov, Rustem Seytmemetov ve İzzet Abdullayev.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
