Rusiye mahkemesi tarafından 13 yılğa azatlıqtan marum etilgen "Qırım musulmanları davası" figurantı Rustem Seytmemetovğa, Rusiyeniñ Ulyanov vilâyetindeki Dimitrovgrad apishanesinde miokard infarktından soñ ameliyat yapıldı. Bu aqta "Qırım birdemligi" cemaat birleşmesine onıñ ömür arqadaşı Zera Seytmetmetova bildirdi.
Tuvğanlarınıñ aytqanına köre, Rustem Seytmemetov mayısnıñ 15-nde yaramağan. Bundan evel o, pek suvuq olğan diger kamerağa karantinge avuştırıldı. O ve zindandaşları qızınmaq içün sıq-sıq idman keçire ediler, amma bir kere o, esini coydı.
Nezaretçiler acele yardım çağırdı. Tibbiyet hadimleri Seytmetmetovnı vilâyet kardiologiya merkezine alıp ketmege qarar berdiler, mında oña miokard infarktı diagnozı qoyuldı ve ameliyat yapıldı. Ameliyat 40 daqqa devam etti. Onıñ qan damarı stentlendi, yani tarlaştırılğan qan damarı keñleştirildi, böylece qan yürekke problemsiz kelip çıqa bile.
Ameliyattan soñ onı Dimitrovgrad SİZO-9-ğa alıp kettiler, anda apishaneniñ hastahanesi bar. Ekimler oña nitrogliserinni ve Rustem adlarını bilmegen diger ilâc berdi.
Oktâbrniñ 29-nda Rostov-na-Donu Cenübiy okrugınıñ arbiy mahkemesi Qırım sakinleri Bağçasaray "Hizb ut-Tahrir davası"nıñ mabüslerine üküm çıqardı. Mahkeme olarnı "akimiyetni zorbalıqnen zapt etmege tırışqanında" ve "terror teşkilâtında iştirak etkeninde" qabaatladı ve olarnı sert rejimli koloniyada tutmağa qarar aldı.
Advokat Edem Semedlâyevniñ malümatına köre, Seytumer Seytumerov 17 yıl, Osman Seytumerov - 14 yıl, Amet Suleymanov - 12 yıl, Rustem Seytmetov - 13 yıl sert rejimli apis cezasına mahküm etildi. Advokatnıñ bildirgenine köre, mahküm etilgenlerniñ episi 3 yıl 6 ay apishanede qalmalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
