Qırımda "casuslıq"ta qabaatlanıp 13 yılğa üküm etilgen Yañı Kahovka jurnalisti Serğiy Tsığipa Rusiye koloniyasında muntazam surette basqığa oğray. Onıñ ömür arqadaşı Yelena Tsığipanıñ aytqanına köre, Râzan vilâyetiniñ Skopinde 3-nci sert rejimli tüzetüv müessisesinde onı muntazam sürette qabaatlav izolâtorına yollaylar. Sebep ise dolabındaki qanfet ve dögmelenmegen urbadır. Bu aqta o, "İnsan aqları içün media teşebbüsine" ayttı.
"Şimdi ise onı ŞİZOğa yolladılar, çünki qolları sırtında degil edi. Tafsilâtlarnı ve bunıñ sebebini bilmeyim. Amma bu ilk sefer degil. Bundan evel dögmelenmegen urba içün, dolabında qanvet tutqanı içün, boş vaqtında sport meydançığında bulunğanı içün. Bu, ceza içün sebep olaraq qullanılğan kiçik şeyler", — dep qayd etti o.
Soñki sefer onı bir aftağa ŞİZO-ğa qapatqan ediler.
Tsığipanıñ apayınıñ aytqanına köre, oña ruhiy basqı yapıla ve tüzetüv koloniyasınıñ memuriyeti onı çalışmağa mecbur ete. Amma aqay, Rusiye Federatsiyasınıñ qanunlarına esaslanıp, işni red ete, çünki pensiyağa çıqqan, diger devletniñ vatandaşı ola ve çalışmağa mecbur degil.
"Onı Rusiye vatandaşlığını qabul etmege mecbur eteler, amma o red ete. Bu sebepten koloniya onı ŞİZOğa yollamaq içün daima resmiy sebepler qıdıra. Bu, muntazam psihologik basqı ve iradesini bozmaq ıntıluvlarını köstere", — dep qayd etti Tsığipa.
O, şunı da qoştı ki, resmiy olmağan menbalardan belli olğanı kibi, memuriyet ceza içün sebepler yarata bile. Meselâ, koloniya hadimleri sofrağa ötmek ya da suv şişesini qoya bileler, soñra "bozuvı" dep qayd eteler.
Serğiy Tsığipa — jurnalist, faal ve Yañı Kahovkadan ATO veteranı. Rusiye istilâsı başlağanından berli o, göñülli faaliyetnen oğraşa, Ukrayinağa qoltutuv mitinglerinde iştirak ete ve cenüpte Rusiye areketleri aqqında haber ete edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
