Rusiye apishanesinde "cezasını çekken" qırımlı siyasiy mabüs Oleg Prıhodko sağlığından aytına ve deñiştirilmesini rica ete. Bunı qızı Nataliya "Suspilne" neşrine bildirdi.
"O deñiştirilmesini rica ete. Men andan sağ çıqmam, sağlığım artıq yoq, dey", - dep ayttı qızı.
Nataliyanıñ sözlerine köre, babasına bir çoq sağlı problemleri olmasına baqmadan tibbiy yardım kösterilmey.
"Onı anda horlaylar, basqığa oğratalar. Daa bir şey üstüne almasını isteyler. Evimizge bir şey taşlarlar, dep tehdit eteler. O da bunıñ içün raatsızlana", - dep qayd etti qızı.
2019 senesi fevralniñ 8-nde Qırımdaki FSB idaresiniñ hadimleri Oleg Prıhodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekken ediler.
2021 senesi martnıñ 3-nde Rostov-na-Donudaki Cenübiy arbiy bölgesiniñ mahkemesi Qırımdan ukrain tarafdarı faali Oleg Prıhodkonı terror ücümini azırlağanında ve patlayıcı maddelerni qanunsız yapqanında qabaatlı tanıdı ve 5 yıl sert apis cezasına mahküm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
