Rusiye Federatsiyasında qanunsız şekilde apiske alınğan 18 qırımlı jurnalistten 17-si Rusiye apishanelerinde buluna. Olardan 15-i 19 yılğa üküm etildi, dep "Qırımda söz serbestligi boyunca mahkeme: jurnalist işiniñ fiyatı" forumı vaqtında bildirgen edi uquq qoruyıcı Lutfiye Zudiyeva
"Al-azırda Qırımnıñ çeşit matbuat vastaları ile işbirlik yapqan 18 jurnalistiniñ 17-si, teessüf ki, Qırımdan çıqarılıp, bütün Rusiyede apishanelerde ve cezahanekerde tutula. Olardan 15-i uzun müddetke, meselâ, 19 yılğa endi üküm etildi. Bu pek büyük bir müddettir", — dep ayta o.
"Zenaatdaşlarımıznıñ taqdiri kütleviy haber vastaları ve cemaat teşkilâtlarınıñ diqqat alanında qala. Erte ya da keç bu olarnıñ azat etilüvine ketirecegine inanam. Jurnalistika dünyanı deñiştirgenine inanam ve biznen beraber zenaatdaşlarımıznıñ azat etilmesi içün çalışa", — dep qoştı Zudiyeva.
ZMINA insan aqları Merkeziniñ yolbaşçısı Tetâna Peçonçik Qırımda söz serbestligi ve insan aqları vaziyeti eyileşmey, ve bozuvlarnıñ sayısı er ay arta, dep qayd etti.
Peçonçikniñ aytqanına köre, jurnalistlerge qarşı yapılğan eñ tarqalğan taqip ve ücümler tintüvler, yaqalavlar, sorğular, elektron tehnikasınıñ teşkerüvi, memuriy bozuvlar içün para cezaları ve cinaiy taqip ola.
Uquq qoruyıcı qayd etti ki, Qırım işğaliniñ ilk yıllarında insanlar ğayıp olğan soñ Qırımda zorbalıqnen ğayıp etüv adeti kene de peyda oldı. Ondan ziyade qırımtatar ve ukrayin faaliniñ taqdiri aqqında alâ daa malümat yoq, dep qoştı o.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
