Rusiyeniñ Cezalarnı yerine ketirüv federal hızmetiniñ müdir muavini Valeriy Maksimenko CYKFH tibbiy hadimleri Labıtnangi şeeriniñ hastahane zenaatdaşlarınen beraber Rusiye koloniyasında üküm etilgen Ukraina rejissöri Oleg Sentsovnı zornen aşatmağa azırlanğanlarını tasdıqladı. Maksimenko «İzvestiya» neşirine intervyü berip, «onıñ (Sentsovnıñ – QA) ayatını qurtarmaq içün yapılğan bir adım olğanını ayttı.
«Zornen aşatuv telükesi – hastanıñ tedaviylenmesi telüke olurmı? Sentsovğa ayatı ve sağlığı içün küreşeceklerini ve ölmege bermeyceklerini ayttılar. Qalğanı oña qala edi», – dedi Rusiye memurı.
O, Sentsov açlıqnı toqtatmasa edi, bir şey yapıp olamaycaq edi, dedi.
Haber etilgeni kibi, Oleg Sentsov oktâbrniñ 6-nda açlıqnı toqtatacaq. O, «bunı zornen aşatuv telükesi olğanı içün mecburiy adım» dep adlandırdı.
Amnesty International zornen aşatuv azap ola, dep bildirdi.
Oktâbrniñ 5-nde Rusiye apishane nezaretçileri Sentsov «aşamağa razı olğanını yazma şekilde bildirdi», dep haber etti.
Advokat Dmitriy Dinze ve Sentsovnıñ qız qardaşı Natalya Kaplan üküm etilgen rejissörniñ cigeri çürip dağılmağa ve büyrekleri çalışmayıp qala bilecegini aytqan ediler. Rusiye ekimleriniñ fikirince, Sentsov açlıqtan çıquvğa dayanmay bile.
Mayısnıñ 14-nde Oleg Sentsov Rusiye apishanelerinde yatqan bütün ukrainalı siyasiy mabüslerniñ azat etilmesi talabınen müddetsiz açlıq ilan etken edi.
Sentsov ve Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti. Rusiyede mahküm etilgen Oleg Sentsovnı qurtarmaq çağıruvı ile petitsiya Beyaz Saraynıñ saytında 100 biñden ziyade insan tarafından imzalandı.
