Qırımda Rusiye uquq qoruyıcıları tarafından patlayıcı madde ve silâ saqlağanında qabaatlanğan qırımtatar faali Edem Bekirov Semaşko Cumhuriyet hastahanesine tibbiy teşkerüv içün yatqızılmadı. Bu aqta «Agora» halqara aq qorçalayıcı gruppasınıñ advokatı Aleksey Ladin Qırım.Aqiqat mühbirine tarif etti.
«SİZO tibbiy bölüginiñ yolbaşçısınen laf ettim, Bekirovnı tibbiy teşkerüvge alıp ketmediler, konvoy toplanmadı. Bekirovnı yarın üylege qadar alıp ketmege planlaştıralar», – dedi Ladin.
Rusiye ombudsmeni Tatyana Moskalkova bildirdi ki, Qırımda apiske alınğan qırımtatar faali Edem Bekirovnıñ SİZO kamerasında «ihtiyacı olğan er şeyi bar».
Ukraina ombudsmeni Lüdmila Denisovanıñ qayd etkenine köre, Moskalkova Qırımdaki Rusiye cezalarnı yerine ketirüv Federal hızmetiniñ yolbaşçısınen laf etti, ve o, yanvarniñ 14-nde Edem Bekirov kerekli tibbiy teşkerüvler içün hastahanege baracaq ve oña tibbiy yardım kösterilecek, dep vade etti.
Rusiye kontrolindeki Qırım Yuqarı mahkemesi yanvarniñ 10-nda Edem Bekirovnıñ apiske alınmasına qarşı itiraz arizalarını baqmağa planlaştıra.
Bekirovnıñ tuvğanları ayatı telükede olğanını bildirgen edi. Malüm ki, apiske alınğan faal şeker hastası ola. Ayağı kesilgen, muntazam sürette sarğılav yapılmalı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler.
Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq. Ukraina Tış işler nazirligi mahkemeniñ qararına qarşı «sert narazılıq» bildirdi.
