Rusiye alıpbarıcısı ve bloger Anastasiya İvleyevanı, ilhaq etilgen Qırımnı ziyaret etkeni içün, Ukrainağa yibermediler dep bildire Ukraina Devlet Sıñır Hızmeti.
“Qadın Kyivge Minsk uçağınen keldi. Sıñır teşkerüvi devamında, seyaatçı 2017 senesi Qırım Muhtar Cumhuriyetinde bulunğanı bilindi. O añlatqanına köre, yarımadağa raatlanmaq niyetinen barğan ve anda Rusiye toprağından uçaq ile kelgen edi. Ukraina qanunlarını bozğanından sebep, qadınğa 3 yılğa Ukrainağa kirmek yasağı berildi ve sıñır keçmesi red etildi”, - denile beyanatta.
İvleyeva “Oröl i reşka. Perezagruzka” televizion yayınıñ alıpbarıcısı kibi belli. Şimdigece onıñ kiriş yasağına tefsirleri yoq.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
