Qırımnıñ Rusiye akimiyeti, 2023 senesiniñ başından berli 36,2 biñ insan yarımadanı terk etti, dep bildirdi.
Rusiye Nazirler şurasınıñ matbuat hızmeti bildirgenine köre, yanvar ayından oktâbr ayına qadar Qırımğa 39,7 biñ insan köçken.
Migrantlarnıñ 79,6 faizi Rusiyeden keldi, dep aytıla.
İnsan aqları Ukrayina Helsinki gruppası, Qırım ilhaqından soñ yarımadağa 800 biñ rusiyeli keldi, 100 biñ ukrayin Qırımnı terk etti, dep bildirgen edi.
Qırımnıñ rusiyeliler tarafından işğal etilgenini Rusiye statistikası da tasdıqlay edi. Böylece, 2021 senesi Rusiye kontrolindeki Krımstat 2014 senesinden 2020 senesine qadar ealiniñ köçüvi aqqında malümatnı derc etti. Bu malümatqa köre, altı yıl içinde Qırım ealisi Rusiye regionlarından köçip kelgenler sayesinde 200 biñ insanğa arttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
