Qırımnıñ Aqmescit rayonındaki Sarabuz qasabasında patlav sesleri eşitildi, dep haber eteler Rusiye telegram kanalları. Yarımadanıñ Rusiye reberligi Qırımnıñ merkeziy qısmında "pilotsız uçaq urıp tüşürilgeni" aqqında haber etti.
Rusiyege qoltutqan bloger Aleksandr Talipov Sarabuzda eşitilgen patlav sesleri "Ava mudafaası quvetleriniñ" işidir, dep bildirdi.
Biraz soñra Qırımnıñ işğal yolbaşçısı Sergey Aksönov Qırımnıñ merkeziy qısmında "pilotsız uçaq urıp tüşürilgeni" aqqında bildirdi.
"Qırımnıñ merkeziy qısmında Ava mudafaası quvetleri duşmannıñ pilotsız uçağını urıp tüşürdiler. Zarar körgenler ve dağıluvlar yoq. Er kesni sakin olmağan ve malümatnı resmiy menbalardan oqumağa çağıram", - dep yazdı telegram kanalında Aksönov.
Bundan ğayrı bir sıra Rusiye telegram kanalı Novofedorivkadki uçaq alanı civarında da patlavlar yüz bergeni aqqında haber ettiler. İşğal akimiyeti bu malümatnı şimdilik daa izaatlamadılar.
Arbiy areketler sebebinden malümatnı mustaqil menbalardan teşkermege imkânsızdır.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
