Rusiye akimiyeti ve Rusiye arbiyleri işğal etilgen Qırım territoriyasında Rusiye ordusına çağıruv planını yerine ketirip olamadılar, şunıñ içün Qırım yarımadasında mobilizatsiya tedbirleriniñ quvetleştirilmesi planlaştırıla, dep bildire Ukrayina milliy tirenüv merkezi.
"Plan kerekli seviyesiniñ 34%-ı ile yerine ketirildi, şunıñ içün Qırım yolbaşçısı vazifesini eda etken Sergey Aksönov Vladimir Putinniñ cenkte ölmesi içün yerli ealini celp etmek içün mobilizatsiya tedbirlerini quvetleştirmek içün quvetçiler ile toplaşuv keçirdi", — dep aytıla haberde.
Milliy tirenüv merkeziniñ bildirgenine köre, "cenkniñ özü yerli eali arasında populâr degil", şunıñ içün Rusiye akimiyeti ve RF arbiyleri "zorbalıq tedbirlerini quvetleştirmekni" planlaştıralar.
Rusiye tarafı bu malümatnı izaatlamadı.
Ukrayina milliy tirenüv Merkezinde bildirgenlerine köre, Kreml Qırımnıñ Rusiye akimiyetine yarımadada Rusiye ordusı içün 2,7 biñ muqavele askerini celp etmek planını belgiledi.
Bundan evel Qırımtatar resurs merkeziniñ idare yolbaşçısı Eskender Bariyev Rusiye akimiyeti aprelniñ 20-nden başlap Ukrayinağa qarşı cenkte iştirak etmek içün erkeklerni daa faal sürette toplamağa başladı, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
