Rusiye akimiyeti tarafından mahküm etilgen qırımlı faal Vladlen Abdulkadırov RF-nıñ Arhangelsk vilâyetiniñ 21-nci apishanesine avuştırıldı, dep bildire "Qırım birdemligi" cemaat birleşmesi onıñ ömür arqadaşı Gülzar Abdulkadırovğa atıf etip.
Vladlen soy-sopuna telefon etip, 70 saattan ziyade yolda olğanını bildirdi. Bundan evel Abdulkadırovnı Rusiye Federatsiyasınıñ Lipetsk vilâyetiniñ Yelts şeerinde apishanede tuta ediler.
"Bu etap, şahsiy eşyalarnıñ sekiz tintüvinen ve 70 saatlıq yolculıqnen keçti", — dep bildirdi Gülzar.
Daa evel haber etilgenine köre, Abdulkadırovnıñ arqa problemleri bar.
2022 senesi mayısnıñ 12-nde Rostov-na-Donudaki Cenübiy okrugınıñ arbiy mahkemesi qırımtatarlarnı «Hizb ut-Tahrir» teşkilâtına alâqası bar olğanında qabaatladı. Bilâl Adilov, Tofik Abdulgaziyev, Vladlen Abdulkadırov, İzzet Abdullayev ve Mecit Abdurahmanov umumen 62 yılğa azatlıqtan marum etildiler.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
