Qırımtatar resurs merkeziniñ idare reisi ve Qırımtatar Milliy Meclisi prezidiumınıñ azası Eskender Bariyev qırımtatar İbraim İbragimov tutulğanını bildirdi.
Onıñ aytqanına köre, Rusiye quvetçileri 36 yaşındaki erkekni 2025 senesi arman ayınıñ 5-nde Soçi ava limanında tuttı, soñra ise "devlet hainliginde" (RF Ceza kodeksiniñ 275 maddesi) qabaatladı.
Eskender Bariyev qayd etti ki, tek mustaqil advokat tutulğan soñ soy-sopları İbraimniñ Türkiyege ketmegenini bilip oldı. O, apiske alınğan ve SİZO-ğa yollanğan.
"Genç adamnı, büyük istilâ başlağan soñ, Ukrayina esaplarından birine 3000 ğrivna köçürgeninde qabaatladılar. 3 aydan berli İbraim azatlıqtan marum etilğen ve Qırımda tuvğanlarınen bağ qurmağa imkânı yoq", — dep qayd etti Bariyev.
Rusiye uquq qoruyıcı organları bu vaziyetni izaatlamadı.