Qırımnıñ Rusiye akimiyeti, olarnıñ fikirince, Ukrayina vatandaşlarına ait olğan Qırım yarımadasındaki mülkniñ "devletleştirilüvini" devam etmekni planlaştıra. Bu aqta Qırımnıñ Rusiye parlamentiniñ spikeri Vladimir Konstantinov "RİA Novosti Krım" Rusiye agentligine bildirdi.
"Olarnı tapmaq içün iş devam ete. Şimdiki vaqıtta komissiya, bir çoq farqlı yuridik ve fizikiy şahıslar bağlı olğan şirketlerni belgiley. Saipleri bu aktivlerni gizlemege tırışalar, amma olar tapılacaq", — dedi Konstantinov.
Daa evel Qırımnıñ Rusiye akimiyeti Qırımda Ukrayina vatandaşlarınıñ "milliyleştirilgen" mülkiyetiniñ satıluvından 1,7 milliard rusiye rublesi elde etkenini iddia etken edi.
2023 senesi dekabrniñ 29-nda Qırımnıñ Rusiye parlamenti yolbaşçısı Vladimir Konstantinov Qırımda Ukrayina vatandaşlarınıñ 2600 areketli ve taşınmaz mülkiyetiniñ milliyleştirilüvi aqqında bildirdi. Hususan, bu cedvelge iş adamı İgor Kolomoyskiyniñ aktivleri, Qırımtatar Milliy Meclisiniñ binası ve Ukrayina prezidentiniñ ömür arqadaşı Olena Zelenskanıñ dairesi kirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
