Rusiye ükümeti üç aydan ziyade cedvelge alınmayıp köçkenini arbiy komissarlıqqa haber etmegenleri içün cezalarnı arttırmağa teklif etecek qanun leyhasını tasdıqladı.
Memuriy kodeks deñişmeleriniñ teşebbüsçisi Devlet Dumasınıñ Mudafaa komitetiniñ bölbaşçısı Andrey Kartapolov oldı.
Şimdiki qanunğa köre, vatandaşlar evlilik vaziyeti, tasil, iş yeri, vazifede deñişmeler aqqında, bunıñnen beraber cedvelge alınmayıp köçkeni ya da altı yıldan ziyade bir müddetke Rusiyeden çıqqanı aqqında arbiy komissarlıq ya da yerli idarege haber etmek kerekler.
Yañı para cezalarınıñ miqdarları aytılmay. Şimdiki vaqıtta qayd olmayıp yañı yaşağan yerge köçkenini arbiy komissarlıqqa haber etmegeni içün eñ büyük para cezası beş biñ ruble ola. Arbiy hızmetke mecburiy olğan şahıs çağıruv vaqtında yaşağan yerini deñiştirgenini ya da üç aydan ziyade müddette bulunmağanını haber etmese, oña 10-dan 20 biñ rublege qadar para cezası berile.
Mudafaa komitetiniñ azası Viktor Zavarzinniñ «Podyom» neşirine bergen izaatlarında miqdar meselesi sıranen çezilecek, dep ayttı. Zavarzinniñ fikirince, «10-20 biñ ceza – az, daa çoq kerek».
Halqara toplulıq ilhaqnı tanımasa da, Rusiye 2014 senesinden başlap Qırımnı öz toprağı dep saya ve anda qanunlarını qullana. Şunıñ içün Rusiye Federatsiyasında arbiy cedvelge aluv talaplarınıñ sertleşmesi işğal altındaki yarımadağa da tesir ete.
Qırımda qanunsız şekilde arbiy hızmetke çağıralar, yerli sakinler arasında arbiy hızmetniñ teşviqatını yapıp, Rusiye Silâlı quvetlerine qoşulmağa çağıralar. Aq qorçalayıcılar qayd etkenine köre, böyle areketler halqara uquqnıñ sert bir bozuluvı ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
