Qırımnıñ Rusiye akimiyeti müzey degerlikleri ve medeniy miras obyektlerini tahliyege azırlay, bir qısmını qomşu Rusiyege çıqarmağa planlaştıralar. Bu aqta Ukrayına Milliy tirenüv merkezi Qırımnıñ Rusiye medeniyet nazirliginiñ medeniy mirasnı devlet qoruvı departamentiniñ vesiqasına esaslanıp haber ete.
«Milliy tirenüv merkezine berilgen vesiqada felâket ya da arbiy areketler olsa, «degerlikler tahliye etilecek yerlerniñ» cedvelini tizmek kerek dep aytıla. Rusiye qanunlarına köre, böyle yerlerniñ cedveli çoqtan tasdıqlanmalı edi, amma malümatnı «Rusiye Medeniyet nazirliginiñ yañı mektübi» vastasınen bermege rica eteler. Müzeylerniñ memuriyetlerine bu yıl iyulniñ 1-ne qadar cevap bermeleri içün vaqıt berildi», – dep aytıla Milliy tirenüv merkeziniñ haberinde.
Milliy tirenüv merkezi Qırımnıñ Rusiye akimiyeti Qırımda müzey artefaktlarınıñ çeşitledirilüvi ve qıymet kesilüvini tezleştirmege tırışa, dep qoştı. Qırımdaki müzey hadimleri sanat eserleri ve tarihiy abidelerniñ elektron cedvellerini tizip, Rusiyeniñ elektron müzey fonduna malümat bere.
Bu malümatnı başqa menbalarda teşkermek imkânsız ola.
Bıltır sentâbr ayında Aqyardaki Rusiye Fevqulâde vaziyetler nazirliginiñ idare saytında bildirilgenine köre, Rusiye akimiyeti «eali tahliyesi» olsa, medeniy zenginliklerni Aqyar müzeylerinden Rusiyege ketirmege planlaştıralar.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
