Rusiye Federatsiyasınıñ Memuriy uquq bozuvları kodeksiniñ kütleviy haber serbestligini bozuv içün mesüliyetke çeküv maddesini Rusiye akimiyeti mustaqil jurnalistlerni ve Qırımda söz serbestliginiñ eñ kiçik numayışlarını bastırmaq içün qullanğan qanun aletlerinden biridir. Bunı Qırım.Aqiqatnıñ talñlcisi Yevğan Yaroşenko bildirdi.
Yaroşenkonıñ aytqanına köre, Rusiye akimiyeti kütleviy haber serbestliginiñ istismarı aqqında maddeni mustaqil jurnalistlerni taqip etmek ve söz serbestligini bastırmaq içün qullanmaqta. Hususan, onı daa evel Abdureşit Cepparov, Lutfiye Zudiyeva ve Emil Kurbedinov kñbi qırımlı uquq qoruyıcılarğa qarşı qullanğan ediler.
Keçken afta Rusiyeniñ nezaretindeki Aqmescitniñ Demiryol rayon makemesi "Qırım" mustaqil qırımtatar gazetiniñ baş muarriri Bekir Mamutovğa 4 biñ rusiye rublesi miqdarında para cezasını tayin etti. Rusiye Federatsiyasınıñ Memuriy cinayetler kodeksiniñ 13.15 maddesi. Bekir Mamutovnı, neşirlerinden birinde "Amerika sesi" ve "Azatlıq Radiosı" mediaları "çetel agentleri" olaraq qayd etilmegeni içün mesüliyetke çektiler.
"2021 senesi Bekir Mamutovğa da BMT Baş kâtibiniñ Qırımda insan aqları vaziyeti aqqında maruzasınıñ alıntıları içün 4 biñ ruble para cezası berilgen edi, mında Qırımtatar Milliy Meclisi Rusiye Federatsiyasında yasaq etilgen teşkilât olaraq qayd etilmey. Böylece, işğalci akimiyet söz serbestliginiñ iç bir numayışını bile qabul etmey, atta BMT Baş kâtibiniñ maruzalarında tasdıqlanğan faktlar aqqında aytılsa bile", — dep qayd ete talilci.
Soñki yarım yıl içinde işğalciler "Qırım" gazetine qarşı üç memuriy cinayet davasını açtılar. İşğalci makemelerniñ "Qırım" gazetine ve onıñ baş muarriri Bekir Mamutovğa çıqarğan memuriy para cezalarınıñ umumiy miqdarı tahminen 800 biñ rubleni teşkil ete. Bundan da ğayrı, bu sene noyabr ayında gazet muarririyeti kütleviy haber serbestligini bozuvda qabaatlı tanıldı, lâkin cezanıñ miqdarı alâ daa belli degil.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
