Avgustnıñ 26-nda gece saat 3-lerde Moskvağa dron ile ücüm etmege kene tırıştılar, dep bildirdi paytahtnıñ başı Sergey Sobonân ve Rusiye Mudafaa naziri.
Haber etilgeni dronnı Podmoskovyeniñ İstrinsk rayonında ava mudafaası sistemi urıp tüşürgen. Yaqlanğanlar ve bozuvlar yoq.
Moskva ava limanları kene qapatılğan. Yigirmiden ziyade uçuş keçke qalğan, sekiz lâğu etilgen.
Soñki vaqıtları, Rusiyeniñ Ukrayinağa ücüm etkeninden bir buçuq yıl soñra, Moskva muntazam şekilde dronlar ücümi altında qala.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
